TRUDE – Hätz, Geföhl un Tschingderassabum

Wat kütt erus, wa’mer 15 Theaterstöcker vum Trude Herr en eine Pott schmießt un dann gaaanz genösslich durch der Scala-Wolf dreiht? Genau! En rösig Theaterspektakel bei däm uns selvs de Luff fottbliev.

En däm turbulente Spillche treffe plötzlich alle Figure us dä knatschjecke Komödie openander: Üvverdriehte Wiever, schääle Casanovas, Föttchesföhler, selvsernannte Modeschöpfer, Ääzezäller, Botzedresser, avgebröhte Rüffcher un Mauerblömcher.

Große Paare der „herr’schen“ Weltliteratur

• Herodes un Mariamne Müller
• Jean-Jaques un Melanie Schmitz
• Karl Salewski un Anneliese Kolvenbach

Un wann dann Frankensteins Schwiegermutter, et versoffe Lenche un de kölsche Geisha nit nor versöke durch ein Dür op de Bühn, sondern och op eine Abtredd zo kumme, künnt Ehr Üch dat Palaver jo jetz ald vürstelle.

Vürhang op för: TRUDE Hätz, Geföhl un Tschingderassabum!